Eth cantautor, musician e escrivan Vicent Torrent siguec eth protagonista indiscutible des actes prealables celebradi en Tortosa, en marc dera presentacion dera 19a Hèira LITTERARUM en cap-lòc deth Baish Èbre, eth passat dimèrcles 29 d’abriu. Torrent, membre deth grop Al Tall, presentèc eth sòn darrèr libre “Totes les cançons” en ua libraria, La Irreal de Tortosa, totauments atapida e damb preséncia deth baile e còssa de Cultura de Móra d’Ebre, Rubén Biarnés e Montse Pineda, era bailessa de Tortosa, Mar Lleixà, e Dolors Róo, presidenta d’Òmnium Terres de l’Ebre. Posterioraments, a El Forn de la Canonja, ua cinquantia de persones, entre es que i auie es mencionadi representants de Móra d’Ebre, eth tinent-baile e era còssa de Lengua Catalana der Ajuntament de Tortosa, Jordi Jordan e Pilar Caballé, atau coma representants de DiLLUMS d’Arts al Forn, CEL, Assemblea Nacional Catalana, CGT, Espai de So, Rondalla dels Ports, Movem Tortosa, ERC, Junts… renderen un aumenatge tad aguest valencian, autor, entre autes, d’imnes coma era cançon de “El Tio Canya” o ”Darrer diumenge d’octubre”. Bèi uns des assistents li dediquèren parlaments de laudança, entre es actuacions dera cantautora Montse Castelhan, es versadores ampostines Dolors Espelta, Maria-Rosa “la Catxa” e “Imma de Sopa” e era Rondalla dels Ports e era Colla de dolçainers i tabaleters “A mig camí” de Tortosa.
