LITTERARUM
Hèira d’espectacles literaris en catalan/valencian e occitan e Hèira deth Libre Ebrenc
Litterarum ei ua dobla hèira.
D’ua banda, ua hèira professionau, neishuda er an 2008 en Móra d’Ebre, que apròpe era literatura catalana e, des de 2025, era literatura en occitan (idiòma autoctòn dera Val d’Aran, sud de França e nòrd d’Itàlia, oficiau en tota Catalonha) as scenaris, a trauès de produccions d’arts scenics e de carrèr: teatre, musica, dança, mariòtes, pantres, circ, mapatge o formats híbrids, que s’inspiren en òbres literàries ja editades.
E d’auta banda, ua hèira de publicacions e autors, era “Fira del Llibre Ebrenc”, neishuda eth 2024, que amasse en caplòc dera Ribèra d’Ebre, escrivans/nes, libraries (Viladrich, Guaix, El Núvol e Bassa), revistes (difonudes per IRMU e er APPEC) e libres des comarques centraus catalanòfones.
Organizada per Ajuntament de Móra d’Ebre, IRMU, Consell Comarcal de la Ribera d’Ebre e CERE, e damb eth supòrt dera Institucion des Letres Catalanes e auti organismes oficiaus e entitats der airau lingüistic catalanovalencian, Litterarum convertís Móra d’Ebre e, des de 2025, Morella (es Pòrts, País Valencian), Calaceit (Matarranha, Aragon) e Reus (Baish Camp, Catalonha), en un epicentre creatiu a on programaires e public descorbissen espectacles unics damb es letres catalanovalencianes e occitanes coma basa.
Origina e objectius
Neishuda enes Tèrres der Ebre, Litterarum, en sòn vessant coma hèira d’espectacles, aposte per un modèl culturau basat ena difusion dera literatura a trauès des arts. Eth sòn objectiu ei qu’aguesti espectacles literaris se programen pendent tot er an arreu dera Catalanofonia, er encastre lingüistic catalanovalencian, des de l’Alguer enquia el Carxe murcian, des d’Andòrra enquia Maó, des de Fraga enquia Salses e des d’Aiguaviva de Bergantes enquia Guardamar de Segura.
En sòn vessant coma hèira d’autors e publicacions, era “Fira del Llibre Ebrenc”, sage de difóner era produccion literària des escrivans/es neishudi enes Tèrres der Ebre e comarques vesines valencianes e aragoneses, ath bèl miei deth territòri catalanofòn.
Litterarum Petits
Ua programacion d’espectacles especifics pensada entàs mainatges e un espaci damb talhèrs, concorsi, jòcs e lectures entà fomentar er amor pera literatura en catalan/valencian des de plan petiti. Damb monitors especializats e un airau ludic familhau dubèrt tot eth dia, damb era collaboracion der Esplai Treu Banya.
Litterarum Jóvens
S’articule en dus actes de liurament de prèmis destinadi as joens lectors e artistes: Es LLIBRESEBRENC.ORG convocadi peth Consell Comarcal de la Ribera d’Ebre, e es de LA POESIA CATALANA A LA MÚSICA URBANA que convòque era escòla itineranta Versembrant e era Plataforma per la Llengua. Ath delà, damb eth supòrt des Departaments d’Educacion e de Politica Lingüistica de Catalonha e deth Consell Comarcal se programen talhèrs literaris enes centres educatius e, pendent era Hèira, sessions d’espectacles entar alumnat comarcau.
Litterarum en Occitan
Sensibilizadi per idiòma mès minoritari e minoritzat en Catalonha, er occitan, ena sua varianta aranesa, Litterarum programa des de 2025 aumens un espectacle en aguesta lengua vesina e fraia deth catalan/valencian. Ath delà, compdam damb era collaboracion dera Academia Aranesa dera Lengua Occitana (AALO) e eth Cercle d’Afrairament Occitanocatalan (CAOC) que dan a conéisher libres e materiaus en occitan entre es visitants dera Hèira
Litterarum Club
Litterarum convide as Clubs de Lectura a gaudir d’espectacles literaris en lengua catalana de diferentes disciplines en dirècte. Aufrim er accès gratuït e resèrva de sètis a toti es espectacles en La Llanterna Teatre o espacis barradi, enquia completar aforament. Activitat coordinada pera Bibliotèca Comarcau Artur Cot i Miró, de Móra d’Ebre.